ວັນທີ 5 ມີນາ 2026, ທີ່ສູນການຄ້າພາກຊັນ (ເດີ່ນດ້ານຫຼັງ), ນະຄອນຫຼວງວຽງຈັນ, ໄດ້ມີພິທີເປີດງານວາງສະແດງຜົນງານ ແລະ ຜະລິດຕະພັນຂອງອົງການຈັດຕັ້ງສັງຄົມລາວ ປະຈຳປີ 2026 (CSO FAIR 2026) ຂຶ້ນຢ່າງເປັນທາງການ ພາຍໃຕ້ຄຳຂວັນ: “ພ້ອມກັນກ້າວເດີນ ເພື່ອຄວາມສົມບູນພູນສຸກຂອງສັງຄົມລາວ” (Move Together for Prosperity of Lao Society).
ໃຫ້ກຽດເຂົ້າຮ່ວມໃນພິທີເປີດໂດຍ ທ່ານ ປອ ວິສຸກ ພົມພິທັກ, ຮອງຫົວໜ້າຄະນະຈັດຕັ້ງສູນກາງພັກ; ທ່ານ H.E. Hans-Ulrich Suedbeck, ເອກອັກຄະລັດຖະທູດ ສາທາລະນະລັດ ສະຫະພັນ ເຢຍລະມັນ ປະຈຳ ສປປ ລາວ, ທ່ານ ນາງ ເບເນດິກ ເດຊັອງ ເອກອັກຄະລັດຖະທູດຝຣັ່ງ ປະຈຳ ສປປ ລາວ ; ກ່າວເປີດງານໂດຍ ທ່ານ ນາງ ມີນາວັນ ພົນເສນາ, ປະທານຄະນະກໍາມະການປະສານງານອົງການຈັດຕັ້ງສັງຄົມ (LCCC), ພ້ອມດ້ວຍຜູ້ຕາງໜ້າຈາກບັນດາກະຊວງ, ຄູ່ຮ່ວມພັດທະນາ, ອົງການຈັດຕັ້ງສັງຄົມ ແລະ ແຂກທີ່ຖືກເຊີນເຂົ້າຮ່ວມຢ່າງພ້ອມພຽງ.
ງານ CSO FAIR 2026 ໃນຄັ້ງນີ້ ມີກຳນົດຈັດຂຶ້ນເປັນເວລາ 3 ວັນ (ນັບແຕ່ວັນທີ 5-7 ມີນາ 2026) ໂດຍມີຈຸດປະສົງຫຼັກເພື່ອສະແດງໃຫ້ເຫັນເຖິງບົດບາດ ແລະ ຜົນສຳເລັດອັນພົ້ນເດັ່ນຂອງອົງການຈັດຕັ້ງສັງຄົມ (CSO) ໃນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຢູ່ ສປປ ລາວ. ທັງນີ້ ກໍເພື່ອເປັນການເຜີຍແຜ່ຄວາມຮູ້, ປູກຈິດສຳນຶກ ແລະ ສ້າງເວທີແລກປ່ຽນບົດຮຽນລະຫວ່າງພາກສ່ວນຕ່າງໆ ບໍ່ວ່າຈະເປັນພາກລັດ, ຄູ່ຮ່ວມພັດທະນາ ແລະ ມວນຊົນທົ່ວໄປ.
ເນື້ອໃນຫຼັກຂອງງານໃນປີນີ້ໄດ້ສຸມໃສ່ 4 ຂົງເຂດສຳຄັນ ຄື: ຄຸນຄ່າຂອງເຄືອຂ່າຍ ທີ່ເນັ້ນຄວາມສາມັກຄີ, ການມີສ່ວນຮ່ວມ ແລະ ຄວາມໂປ່ງໃສ; ສິ່ງແວດລ້ອມ ທີ່ເນັ້ນການມີສ່ວນຮ່ວມຂອງໄວໜຸ່ມໃນການຈັດການສິ່ງເສດເຫຼືອ; ສຸຂະພາບ ທີ່ເນັ້ນສຸຂະພາບຈິດຂອງແມ່ຍິງ ແລະ ເດັກຍິງ ພາຍໃຕ້ແນວຄິດ “ສຸຂະພາບໜຶ່ງດຽວ” ແລະ ການສຶກສາ ທີ່ເນັ້ນສົ່ງເສີມການຮຽນຮູ້ຕະຫຼອດຊີວິດ ແລະ ທັກສະວິຊາຊີບ. ນອກຈາກນັ້ນ, ງານໃນປີນີ້ຍັງໄດ້ເຊື່ອມສານຫົວຂໍ້ສະເຫຼີມສະຫຼອງວັນແມ່ຍິງສາກົນ (8 ມີນາ) ດ້ວຍການຍົກປະເດັນ “ການປົກປ້ອງແມ່ຍິງ ແລະ ເດັກຍິງ ຈາກຄວາມຮຸນແຮງທາງໄຊເບີ” ເຊິ່ງຖືເປັນຄວາມຮີບດ່ວນຂອງສັງຄົມໃນປະຈຸບັນ. ກິດຈະກຳພາຍໃນງານມີຄວາມຫຼາກຫຼາຍ ແລະ ໜ້າສົນໃຈ ເປັນຕົ້ນແມ່ນ: ການວາງສະແດງ ແລະ ຈຳໜ່າຍຜະລິດຕະພັນຈາກຊຸມຊົນ, ການສົນທະນາແລກປ່ຽນຄວາມຮູ້ໃນຫົວຂໍ້ຕ່າງໆ, ການປະກວດ “CSO’s Talk”, ການໂຕ້ວາທີຂອງນັກຮຽນ-ນັກສຶກສາ, ແລະ ການສະແດງສິລະປະວັດທະນະທຳ.
ພິເສດ ໃນວັນທີ 7 ມີນາ ຈະມີກິດຈະກຳ "ລາວແບບໃດ!" ທີ່ເຊີນຊວນໃຫ້ຜູ້ເຂົ້າຮ່ວມນຸ່ງຊຸດປະຈຳທ້ອງຖິ່ນເພື່ອສະແດງເຖິງເອກະລັກອັນດີງາມຂອງຊາດ.
ງານດັ່ງກ່າວ ໄດ້ຮັບການສະໜັບສະໜູນໂດຍ ແຜນງານທີມເອີຣົບ “CEGGA II” (ແຜນງານການມີສ່ວນຮ່ວມຂອງປະຊາຊົນ ຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍໄລຍະທີ 2) ເຊິ່ງເປັນແຜນງານທີ່ໄດ້ຮັບທຶນຈາກ ປະເທດສະວິດເຊີແລນ, ເຢຍລະມັນ, ແລະ ສະຫະພາບເອີຣົບ ໂດຍການຈັດຕັ້ງປະຕິບັດຮ່ວມກັບ GIZ . ສະຖານທູດຝຣັ່ງ ປະຈຳ ສປປ ລາວ ພ້ອມດ້ວຍບັນດາອົງການຈັດຕັ້ງສາກົນ ຄື: ອົງການແຄຣ໌ນານາຊາດ ປະຈຳ ສປປ ລາວ, ອົງການ ເຮວວິຕັດ ສະວິດ ເພື່ອການຮ່ວມມືສາກົນ ປະຈຳ ສປປ ລາວ, ອົງການອະນຸລັກທຳມະຊາດໂລກ ປະຈຳ ສປປ ລາວ, ອົງການ ຂອດ, ອົງການ ສະວິດຄອນເເທັກ ປະຈຳ ສປປ ລາວ ແລະ ອົງການເຂົ້າຈີ່ເພື່ອປະຊາກອນໂລກ.
Germanyinlaos Swiss Cooperation Mekong European Union in Laos GIZ Laos Ambassade de France au Laos / ສະຖານທູດຝຣັ່ງ ປະຈຳ ສປປ ລາວ WWF-Laos Oxfam in Laos Cord Laos Helvetas Laos Brot für die Welt Swisscontact Lao PDR
