ໃນວັນທີ 22 ທັນວາ 2025, ທີ່ນະຄອນຫຼວງວຽງຈັນ, ຄະນະກໍາມະການປະສານງານອົງການຈັດຕັ້ງສັງຄົມລາວ (LCCC) ພ້ອມດ້ວຍບັນດາອົງການຈັດຕັ້ງສັງຄົມລາວໄດ້ເຂົ້າຮ່ວມ ກອງປະຊຸມສໍາມະນາວິຊາການ ເນື່ອງໃນໂອກາດສະເຫຼີມສະຫຼອງ ວັນຄຸ້ມຄອງໄພພິບັດແຫ່ງຊາດ, ອາຊຽນ ແລະ ວັນຫຼຸດຜ່ອນຄວາມສ່ຽງໄພພິບັດສາກົນ ຈັດໂດຍ ກົມສັງຄົມສົງເຄາະ ກະຊວງແຮງງານ ແລະ ສະຫວັດດີການສັງຄົມ (ຮສສ). ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ໂພໄຊ ໄຊຍະສອນ, ລັດຖະມົນຕີ ກະຊວງ ຮສສ, ຮອງປະທານຜູ້ປະຈຳການ ຄະນະກຳມະການຄຸ້ມຄອງໄພພິບັດຂັ້ນສູນກາງ.
ໃນພິທີເປີດຢ່າງເປັນທາງການ, ທ່ານ ໂພໄຊ ໄຊຍະສອນ ໄດ້ກ່າວເນັ້ນໜັກເຖິງຄວາມສຳຄັນຂອງການຫັນປ່ຽນວຽກງານການຄຸ້ມຄອງໄພພິບັດ ຈາກການຕອບໂຕ້ຕາມເຫດການ ມາເປັນການກຽມພ້ອມ ແລະ ຫຼຸດຜ່ອນຄວາມສ່ຽງໃນທຸກມິຕິ ເພື່ອສ້າງຄວາມເຂັ້ມແຂງໃຫ້ແກ່ຊຸມຊົນ ແລະ ສັງຄົມ ຕາມທິດທາງຂອງອາຊຽນ ແລະ ສາກົນ.
ກອງປະຊຸມສໍາມະນາໃນຄັ້ງນີ້ ໄດ້ມີການນຳສະເໜີບົດຮຽນ ແລະ ສົນທະນາໃນຫຼາຍຫົວຂໍ້ທີ່ສຳຄັນ ເປັນຕົ້ນແມ່ນ: ກົນໄກການຄຸ້ມຄອງໄພພິບັດຢູ່ ສປປ ລາວ, ການມີສ່ວນຮ່ວມຂອງບັນດາຂະແໜງການລັດ ເຊັ່ນ: ກະຊວງການເງິນ, ກະຊວງກະສິກຳ ແລະ ປ່າໄມ້, ກະຊວງໂຍທາທິການ ແລະ ຂົນສົ່ງ, ແລະ ກະຊວງສຶກສາທິການ ແລະ ກິລາ ເພື່ອແນໃສ່ການເຊື່ອມສານວຽກງານຫຼຸດຜ່ອນຄວາມສ່ຽງໄພພິບັດເຂົ້າໃນແຜນພັດທະນາຂອງແຕ່ລະຂະແໜງການ.
ນອກຈາກນັ້ນ, ທີ່ປະຊຸມຍັງໄດ້ມີການປຶກສາຫາລືກ່ຽວກັບການຮ່ວມມືຫຼາຍຝ່າຍ ເພື່ອສ້າງຄວາມເຂັ້ມແຂງໃນວຽກງານຄຸ້ມຄອງໄພພິບັດ ໂດຍມີການເຂົ້າຮ່ວມຈາກ ອົງການສະຫະປະຊາຊາດ (UN), ອົງການ ສປຊ ເພື່ອການພັດທະນາ (UNDP), ທະນາຄານໂລກ (World Bank) ແລະ ຜູ້ຕາງໜ້າຈາກຄະນະປະສານງານອົງການຈັດຕັ້ງທາງສັງຄົມລາວ (LCCC) ເພື່ອແລກປ່ຽນປະສົບການ ແລະ ກຳນົດທິດທາງການຮ່ວມມືໃນອະນາຄົດ.
ໃນຕອນທ້າຍຂອງກອງປະຊຸມ, ຍັງໄດ້ມີກິດຈະກຳຖາມ-ຕອບ ເພື່ອແລກປ່ຽນຄວາມຮູ້ ແລະ ມອບຂອງຂວັນທີ່ລະນຶກໃຫ້ແກ່ຜູ້ເຂົ້າຮ່ວມ.
ກອງປະຊຸມໄດ້ອັດລົງດ້ວຍໝາກຜົນອັນຈົບງາມ ພາຍໃຕ້ການກ່າວປິດຂອງ ທ່ານ ວົງຄຳ ພັນທະນຸວົງ, ຫົວໜ້າກົມສັງຄົມສົງເຄາະ, ເຊິ່ງທ່ານໄດ້ຮຽກຮ້ອງໃຫ້ທຸກພາກສ່ວນສືບຕໍ່ຜັນຂະຫຍາຍເນື້ອໃນຈິດໃຈຂອງກອງປະຊຸມຄັ້ງນີ້ ເຂົ້າສູ່ການປະຕິບັດຕົວຈິງ ເພື່ອເຮັດໃຫ້ ສປປ ລາວ ມີຄວາມພ້ອມ ແລະ ສາມາດຮັບມືກັບໄພພິບັດຕ່າງໆ ທີ່ອາດເກີດຂຶ້ນຢ່າງມີປະສິດທິຜົນ.
