ໃນວັນທີ 4 ກໍລະກົດ 2025 - ຄະນະກຳມະການປະສານງານອົງການຈັດຕັ້ງສັງຄົມລາວ (LCCC) ໄດ້ຈັດກອງປະຊຸມ ເພື່ອຖອດຖອນບົດຮຽນການເຂົ້າຮ່ວມກອງປະຊຸມໂຕະມົນປະຈຳປີ 2024 ແລະ ສະຫຼຸບຜົນການເຂົ້າຮ່ວມກອງປະຊຸມພາກປະຊາຊົນອາຊຽນ (ACSC/APF) ປີ 2025 ທີ່ໂຮງແຮມແກຣນ.
ກອງປະຊຸມຄັ້ງນີ້ ໄດ້ຈັດຂຶ້ນພາຍໃຕ້ການເປັນປະທານຂອງ ທ່ານ ດຣ. ນາງ ຈັນສີ ພີມພະຈັນ, ປະທານ LCCC. ມີຜູ້ຕາງໜ້າຈາກອົງການຈັດຕັ້ງສັງຄົມ (CSOs) ລາວ, ເຊິ່ງປະກອບດ້ວຍ ສະມາຄົມ ແລະ ມູນນິທິ, ພ້ອມທັງຜູ້ຕາງໜ້າຈາກກະຊວງແຜນການ ແລະ ການລົງທຶນ, ກະຊວງການເງິນ, ກະຊວງພາຍໃນ ແລະ ພາກສ່ວນຜູ້ໃຫ້ທຶນ ເຂົ້າຮ່ວມຢ່າງພ້ອມພຽງ. ໃນໂອກາດກ່າວເປີດກອງປະຊຸມ, ທ່ານປະທານ LCCC ໄດ້ເນັ້ນໜັກເຖິງຄວາມສຳຄັນຂອງການປະກອບສ່ວນຢ່າງຕັ້ງໜ້າ ແລະ ມີສ່ວນຮ່ວມຂອງ CSOs ລາວ ໃນຂະບວນການພັດທະນາທັງໃນລະດັບຊາດ ແລະ ພາກພື້ນ ເພື່ອສົ່ງເສີມການພັດທະນາແບບຍືນຍົງ.
ພາຍໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງການລາຍງານ ກ່ຽວກັບຜົນສຳເລັດ ແລະ ບົດຮຽນຈາກການເຂົ້າຮ່ວມງານ ASEAN People's Forum 2025 (APF 2025) ທີ່ໄດ້ຈັດຂຶ້ນທີ່ນະຄອນຫຼວງກົວລາລຳເປີ, ປະເທດມາເລເຊຍ, ຜ່ານມາ. ພ້ອມກັນນັ້ນ, ກໍໄດ້ປຶກສາຫາລືກ່ຽວກັບແຜນການກະກຽມສຳລັບການເຂົ້າຮ່ວມກອງປະຊຸມ ACSC/APF 2025 ເຊິ່ງມີແຜນຈະຈັດຂຶ້ນໃນເດືອນຕຸລາ ປີ 2025 ຢູ່ປະເທດມາເລເຊຍ. ນອກຈາກນີ້, ຍັງໄດ້ມີການສົນທະນາແລກປ່ຽນຄໍາຄິດເຫັນ ແລະ ໃຫ້ຂໍ້ສະເໜີແນະ ເພື່ອປັບປຸງການເຂົ້າຮ່ວມໃນເວທີດັ່ງກ່າວໃຫ້ມີປະສິດທິພາບ ແລະ ໄດ້ຮັບຜົນປະໂຫຍດສູງສຸດ.
ນອກຈາກວຽກງານດັ່ງກ່າວ, ກອງປະຊຸມຍັງໄດ້ທົບທວນຄືນຜົນການເຂົ້າຮ່ວມກອງປະຊຸມໂຕະມົນລະດັບຊາດ (RTM) ປະຈຳປີ 2024 ຢ່າງລະອຽດ ແລະ ໄດ້ເນັ້ນຍ້ຳເຖິງ ຄວາມໝາຍ, ຄວາມສຳຄັນ ແລະ ຂະບວນການເຂົ້າຮ່ວມກອງປະຊຸມ RTM ຂອງ CSOs. ໃນພາກສ່ວນນີ້, ຜູ້ແທນຈາກກະຊວງແຜນການ ແລະ ການລົງທຶນ, ກະຊວງການເງິນ, ກະຊວງພາຍໃນ ແລະ ພາກສ່ວນທີ່ກ່ຽວຂ້ອງໄດ້ຮ່ວມເຜີຍແຜ່ ແລະ ຊີ້ແຈງກ່ຽວກັບບົດບາດທີ່ສຳຄັນຂອງ CSOs ໃນການປະກອບສ່ວນເຂົ້າໃນຂະບວນການ RTM ຂອງ ສປປ ລາວ.
ສິ່ງສຳຄັນອີກອັນໜຶ່ງໃນກອງປະຊຸມຄັ້ງນີ້ ຄື ການແບ່ງປັນປະສົບການຕົວຈິງຈາກຜູ້ຕາງໜ້າ CSOs ທີ່ໄດ້ເຂົ້າຮ່ວມກອງປະຊຸມໂຕະມົນໃນໄລຍະຜ່ານມາ, ເຊິ່ງເປັນບົດຮຽນທີ່ມີຄ່າຢ່າງຍິ່ງສຳລັບຜູ້ເຂົ້າຮ່ວມ. ຈາກນັ້ນ, ຜູ້ເຂົ້າຮ່ວມໄດ້ແບ່ງກຸ່ມຍ່ອຍ ເພື່ອປຶກສາຫາລືຢ່າງເລິກເຊິ່ງໃນຫົວຂໍ້ຕ່າງໆ ເປັນຕົ້ນແມ່ນ ຄວາມສຳຄັນຂອງການເປັນຕົວແທນຂອງ CSOs ໃນ RTM, ມາດຖານ ແລະ ເງື່ອນໄຂການຄັດເລືອກຜູ້ແທນ, ແລະ ຂໍ້ມູນສຳຄັນທີ່ຄວນນຳສະເໜີຕໍ່ກອງປະຊຸມ RTM. ຜົນຂອງການປຶກສາຫາລືຈາກແຕ່ລະກຸ່ມໄດ້ຖືກນຳມາສະເໜີຕໍ່ກອງປະຊຸມໃຫຍ່ ເພື່ອເປັນຂໍ້ມູນໃນການສັງລວມ ແລະ ສະຫຼຸບເປັນທິດທາງລວມ.
