ວັນທີ 12 ທັນວາ 2025 – ກະຊວງແຮງງານ ແລະ ສະຫວັດດີການສັງຄົມ ໄດ້ສົມທົບກັບ ຄະນະກຳມະການແຫ່ງຊາດເພື່ອຄົນພິການ, ອົງການຈັດຕັ້ງສັງຄົມຂອງຄົນພິການ (OPDs), ຄະນະປະສານງານອົງການຈັດຕັ້ງສັງຄົມລາວ (LCCC) ແລະ ບັນດາຄູ່ຮ່ວມພັດທະນາ ຈັດພິທີສະເຫຼີມສະຫຼອງວັນຄົນພິການແຫ່ງຊາດ ແລະ ສາກົນ ປະຈຳປີ 2025 ຂຶ້ນຢ່າງເປັນທາງການ ທີ່ ໂຮງແຮມດອນຈັນພາເລດ, ພາຍໃຕ້ຄຳຂວັນ: "ສົ່ງເສີມການມີສ່ວນຮ່ວມຂອງຄົນພິການ ເພື່ອຄວາມກ້າວໜ້າທາງສັງຄົມ".
ໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານນາງ ແກ້ວ ຈັນທະວີໄຊ, ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ. ພ້ອມນີ້, ຍັງມີບັນດາທ່ານຜູ້ຕາງໜ້າຈາກພາກລັດ, ບັນດາກະຊວງ, ອົງການຈັດຕັ້ງສັງຄົມຂອງຄົນພິການ, ຄູ່ຮ່ວມພັດທະນາສາກົນ ແລະ ຕາງໜ້າສະຖານທູດຕ່າງປະເທດ ປະຈຳ ສປປ ລາວ ເຂົ້າຮ່ວມຢ່າງພ້ອມພຽງ ລວມທັງໝົດກວ່າ 200 ທ່ານ.
ໃນໂອກາດດັ່ງກ່າວ, ທ່ານນາງ ມາຕິນ ເທເຣີ, ຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ (UNDP) ປະຈຳ ສປປ ລາວ ໄດ້ມີຄຳເຫັນຢືນຢັນເຖິງຄຳໝັ້ນສັນຍາໃນການສືບຕໍ່ສະໜັບສະໜູນ ການສ້າງສັງຄົມທີ່ມີສ່ວນຮ່ວມສຳລັບຄົນພິການ. ທ່ານໄດ້ເນັ້ນໜັກວ່າ: "ການມີສ່ວນຮ່ວມ ບໍ່ແມ່ນວຽກງານການກຸສົນ ຫຼື ການສົງເຄາະ, ແຕ່ແມ່ນພັນທະ ແລະ ຄວາມຮັບຜິດຊອບ". ພ້ອມດຽວກັນນັ້ນ, ອົງການສະຫະປະຊາຊາດ ຍິນດີໃຫ້ການສະໜັບສະໜູນລັດຖະບານ ແຫ່ງ ສປປ ລາວ ຢ່າງເຕັມສ່ວນ ໃນການຈັດຕັ້ງປະຕິບັດ ແຜນປະຕິບັດງານແຫ່ງຊາດ ເພື່ອປົກປ້ອງ ແລະ ສົ່ງເສີມສິດຂອງຄົນພິການ, ໂດຍຮັບຮູ້ວ່າ ຜົນສຳເລັດທີ່ແທ້ຈິງຈະເກີດຂຶ້ນໄດ້ ກໍຕໍ່ເມື່ອມີການຮ່ວມມືຢ່າງໃກ້ຊິດ ກັບບັນດາອົງການຈັດຕັ້ງຂອງຄົນພິການ.
ພາຍໃນງານ ຍັງໄດ້ມີການຈັດກອງເສວະນາສອງຮອບທີ່ສຳຄັນ ໃນຫົວຂໍ້ກ່ຽວກັບ ບົດບາດຂອງຄົນພິການຕໍ່ກັບການຈັດຕັ້ງປະຕິບັດນະໂຍບາຍ ແລະ ການມີສ່ວນຮ່ວມຂອງຄົນພິການ. ໂດຍໄດ້ຮັບກຽດຈາກວິທະຍາກອນຕາງໜ້າ ກົມການຈັດຫາງານ, ສະພາແຫ່ງຊາດ, ກະຊວງໂຍທາທິການ ແລະ ຂົນສົ່ງ, ກະຊວງອຸດສາຫະກຳ ແລະ ການຄ້າ, ສະຖາບັນພັດທະນາສີມືແຮງງານ, ອົງການ Humanity & Inclusion, CBM Global, ບໍລິສັດ ວັນມີຣາໂຄ ແລະ ຜູ້ຕາງໜ້າຈາກ OPDs ເຂົ້າຮ່ວມແລກປ່ຽນບົດຮຽນ ແລະ ຄຳແນະນຳ ເພື່ອພັດທະນາວຽກງານຄົນພິການໃຫ້ດືຂຶ້ນ.
ນອກຈາກນີ້, ຍັງມີກິດຈະກຳທີ່ຫຼາກຫຼາຍ ແລະ ມີຄວາມໝາຍສຳຄັນ ປະກອບມີ: ການສະແດງສິລະປະ-ວັນນະຄະດີ ໂດຍ ສະມາຄົມແມ່ຍິງພິການລາວ (WWDA) ແລະ ສະມາຄົມພັດທະນາຄົນພິການຕາ (VDBA), ພິທີມອບ-ຮັບ ປຶ້ມກົດໝາຍວ່າດ້ວຍຄົນພິການ ພາຍໃຕ້ໂຄງການ CEGGA II (GIZ), ການວາງສະແດງຜົນງານ ແລະ ຜະລິດຕະພັນຫັດຖະກຳຈາກ OPDs ຕ່າງໆ, ພ້ອມທັງການນຳສະເໜີພາບລວມວຽກງານພັດທະນາຄົນພິການໃນ ສປປ ລາວ ແລະ ຜົນສຳເລັດໃນປີ 2025.
ການຈັດງານຄັ້ງນີ້ ໄດ້ຮັບການສະໜັບສະໜູນທາງດ້ານງົບປະມານ ແລະ ວິຊາການ ຈາກ ທີມງານເອີຣົບ (Team Europe) ຊຶ່ງປະກອບມີ: ປະເທດເຢຍລະມັນ, ສະວິດເຊີແລນ ແລະ ສະຫະພາບເອີຣົບ ຜ່ານແຜນງານການມີສ່ວນຮ່ວມຂອງປະຊາຊົນ ຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (CEGGA II Programme). ອົງການ ເຮວວິຕັດ ສະວິດ ເພື່ອການຮ່ວມມືສາກົນ ປະຈຳ ສປປ ລາວ , ອົງການສະຫະປະຊາຊາດ ເພື່ອການພັດທະນາ (UNDP) ປະຈຳ ສປປ ລາວ
ພິທີສະເຫຼີມສະຫຼອງໃນຄັ້ງນີ້ ຖືເປັນຂີດໝາຍສຳຄັນທີ່ສະແດງໃຫ້ເຫັນເຖິງ ຄວາມມຸ່ງໝັ້ນຂອງພາກລັດ, ອົງການຈັດຕັ້ງສັງຄົມຂອງຄົນພິການ ແລະ ຄູ່ຮ່ວມພັດທະນາ ໃນການຮ່ວມມືກັນສ້າງສັງຄົມລາວ ໃຫ້ເປັນສັງຄົມທີ່ມີສ່ວນຮ່ວມ, ສົ່ງເສີມສິດທິ ແລະ ໂອກາດທີ່ເທົ່າທຽມກັນ ສຳລັບທຸກຄົນ ຕາມເປົ້າໝາຍການພັດທະນາແບບຍືນຍົງ "ບໍ່ປະຖິ້ມໃຜໄວ້ຂ້າງຫຼັງ".
Swiss Cooperation Mekong European Union in Laos Germanyinlaos GIZ Laos Helvetas Laos United Nations in Lao PDR